హైప్‌ను అందుకోలేకపోయిన ‘ఆవిరి’

700

హైదరాబాద్, నవంబర్ 1 (న్యూస్‌టైమ్): సీనియర్ నటుడు చలపతిరావు తనయుడు రవిబాబు మంచి టాలెంట్ ఉన్న దర్శకుడే. అల్లరి లాంటి చిత్రంతో నరేష్‌ను ఓవర్‌నైట్‌లో స్టార్‌ను చేసి చివరికి ఆ చిత్రం టైటిల్‌నే తప ఇంటి పేరుగా మార్చుకున్న సృజనాత్మకత కలిగిన టెక్నీషియన్. అలాంటి రవిబాబు తాజా చిత్రం ‘ఆవిరి’. అందరికి చిన్నప్పటినుండి తెలిసిన పదమే. కానీ ఈ పదంలో ఒక సినిమాకి టైటిల్ అయ్యేంత మ్యాటర్ ఏముంది అనేది మాత్రం చాలా ఇంట్రెస్టింగ్‌గా అనిపించే విషయం. అలా అనిపించే దిల్ రాజు ఈ సినిమాని సమర్పించడానికి ముందుకొచ్చారు. దిల్ రాజు అనే బ్రాండ్‌కి ఇప్పుడు మార్కెట్‌లో ఉన్న వేల్యూ వల్ల ఈ సినిమాకి మంచి హైప్ క్రియేట్ అయ్యింది. ఇక ఈ జోనర్‌లో రవిబాబు సూపర్ అనిపించే హిట్స్ అందుకున్నారు.

అలాగే ఈ సినిమా ట్రైలర్ కూడా భయపెట్టింది. ఈ అంశాలన్నీ అనుకూలించి ‘ఆవిరి’ అల్టిమేట్ థ్రిల్లర్ అనే భావన కలిగింది. అయితే ఈ రోజు ప్రేక్షకులముందుకు వచ్చిన ‘ఆవిరి’ థ్రిల్లర్ కాబట్టి ఉక్కపోతతో అలరించిందా లేక తుస్సుమనిపించిందా అనేది ఇప్పుడు చూద్దాం.

రాజ్‌కుమార్ రావు (రవిబాబు), లీనా (నేహా చౌహాన్)లకు శ్రేయ, మున్ని అనే ఇద్దరు పిల్లలు. ఆ ఇద్దరికి కూడా ఆస్తమా ఉంటుంది. అయితే ఒకరోజు స్విమ్మింగ్ పూల్‌లో ఇద్దరూ స్విమ్ చేస్తుంటారు. అయితే ఆ టైమ్‌లో శ్రేయకి ఊపిరి అందక ఆమె చనిపోతుంది. అప్పటినుండి లీనా శ్రేయ జ్ఞాపకాలనుండి భయటపడలేకపోవడంతో వేరే ఇల్లు కొనుక్కుని అందులోకి మారతారు. ఆ ఇంట్లోకి మారిన దగ్గరి నుండి మున్ని ప్రవర్తనలో మార్పు వస్తుంది. ఆమెకి ఒక ఆత్మ కనిపిస్తుంటుంది. ఆ ఆత్మ మాటవిని ఇంట్లో నుండి వెళ్లిపోవడానికి ప్రయత్నిస్తుంటుంది మున్ని.

ఆమెని ఆపడానికి రాజ్, లీనా చాలా ప్రయత్నిస్తారు. కానీ మున్ని మాత్రం ఇంట్లో నుండి మాయం అవుతుంది. మున్ని ఏమయ్యింది? అని వెదికే క్రమంలో లీనాని కూడా ఆత్మ ఆవహిస్తుంది. రాజ్ గురించి కూడా అనేక విషయాలు బయటపడతాయి. ఇంతకీ మున్నికి కనిపించిన ఆత్మ ఎవరిది?, మున్నిని ఆ ఆత్మ ఎక్కడికి తీసుకెళ్లింది?, లీనాని ఆవహించిన ఆత్మ ఎవరిది?, అది రాజ్‌పై ఎందుకు పగ తీర్చుకోవాలనుకుంటుంది?, అసలు ఈ కథకి ‘ఆవిరి’ అనే టైటిల్ ఎందుకు పెట్టారు? వంటి విషయాలు తెలుసుకోవాలంటే ఈ సినిమా చూడాలి.

ఆవిరి సినిమా మొదలవ్వడం చాలా మామూలుగానే ఉంటుంది. ఫస్ట్ సీన్‌లోనే ఒక చిన్న ఎమోషనల్ టచ్ ఉండడంతో ఆ సీన్ తరువాత సినిమా చాలా స్లోగా కదులుతుంది. రాజ్, లీనా వేరే ఇంటికి మారాక ఆత్మ అనే కాన్సెప్ట్ కూడా సినిమాలోకి ఎంటర్ అవుతుంది. కానీ ఆ బ్యాక్‌డ్రాప్‌లో వచ్చే సీన్స్ చాలావరకు రవిబాబు గత సినిమాల్లో చూసినవే. ఇంకా కరెక్ట్‌గా చెప్పాలి అంటే చాలా హారర్ సినిమాల్లో చూసినవే. ప్లేటులు, గ్లాసులు గాల్లో ఎగరడం, కుర్చీ జరగడం, తలుపులు తెరుచుకోవడం వంటి సీన్స్‌తో సినిమా నడిచింది. కథ అక్కడక్కడే తిరుగుతుండడం, కథనం కూడా చాలా రొటీన్‌గా ఉండడంతో ఫస్ట్ హాఫ్ చాలా భారంగా గడుస్తుంది.

సింగిల్ పాయింట్‌ని బేస్ చేసుకుని కదిలే కథలో వేగం తీసుకురావడానికి, కాస్త ఎంటర్టైన్మెంట్ జొప్పించడానికి ప్రయత్నించిన రవిబాబు హిమజతో ఒక సీన్, స్విగ్గి డెలివరీ బాయ్‌తో ఒక సీన్ లాంటివి సినిమాలో పెట్టాడు. కానీ అవి పెద్దగా పేలలేదు. ముందు నుండి జరుగుతున్న కథ సినిమాలో క్యారెక్టర్స్‌కి తెలిసే సరికి ఇంటర్వెల్ వచ్చేసింది. ఇంటర్వెల్ తరువాత కూడా కొంచెం సేపు ‘ఆవిరి’ ఏ మాత్రం సెగ పుట్టించదు.

కథనం చాలా నార్మల్‌గా సాగుతూ ఉంటుంది. కానీ భరణి పాత్ర కథలోకి రాగానే కథ కొత్త మలుపు తిరుగుతుంది. లీనాకి దెయ్యం పట్టినప్పుడు వచ్చే కొన్ని సీన్స్ మినహాయిస్తే మిగతా సీన్స్ అన్నీ కూడా బావున్నాయి. ఆత్మని ఈ సినిమాలో రవిబాబు చాలా అమాయకంగా డీల్ చేసాడు అని మాత్రం అనిపిస్తుంది.

ముందు నుండి కథను ఒక డైరెక్షన్‌లో నడిపి, ప్రీ క్లైమాక్స్‌లో మాత్రం వేరే కథ ఓపెన్ చేశారు. అయితే ఆ కథలో జెన్యూనిటీ కనిపించకపోవడంతో సినిమాని నిలబెట్టాల్సిన ఆ ట్విస్ట్ కూడా పెద్దగా పేలలేదు. దాంతో ఎదో ఉంది అనిపించిన ‘ఆవిరి’ చివరికి అనుకున్నంత ఎంగేజింగ్‌గా అయితే సాగలేదు. ఇక ఏ సినిమాకి అయినా కూడా ఎమోషన్ అనేది కీలకం. ఈ సినిమాలో కూడా ఎమోషన్ పండించడానికి చాలా స్కోప్ ఉంది. కానీ ఎందుకోగానీ రవిబాబు దాన్ని సరిగ్గా ఉపయోగించుకోలేదు. ఎమోషన్స్ అన్నీ కూడా ఆర్టిఫీషియల్‌గా అనిపించాయి. ఆ పార్ట్ వరకు రవిబాబు డైరెక్టర్‌గా, నటుడిగా కూడా ఫెయిల్ అయ్యాడు అనిపించింది.

ఇక ఈ సినిమాకి ‘ఆవిరి’ అనే టైటిల్ పెట్టడానికి మాత్రం జస్టిఫికేషన్ పర్లేదు అనేలా ఉంది. ఇప్పటివరకు ఆత్మలు అనే పాయింట్‌తో తెరకెక్కిన సినిమాల్లో చూపించని ఒక కొత్త పాయింట్ టచ్ చేసాడు. కానీ ఆ నావెల్టీ పాయింట్ అంతే స్ట్రాంగ్‌గా తెరమీదకి తీసుకురావడంలో మాత్రం రవిబాబు చాలా తడబడ్డాడు. కొన్ని వందల సినిమాలకు స్క్రీన్ ప్లే అందించిన సత్యానంద్ ఈ సినిమాకి మాత్రం రొటీన్ స్క్రీన్ ప్లే అందించారు. ఇక డైలాగ్స్ కూడా అంత ఎఫెక్టివ్‌గా లేవు. దాంతో ఆవిరి పేరులో ఉన్నంత ఫ్రెష్‌నెస్ ఈ సినిమాలో మాత్రం కనిపించలేదు.

ఈ సినిమాలో నటించిన అందరిలో ఎక్కువ మార్క్స్ వేయించుకుంది నేహా చౌహాన్. ఎమోషన్స్ , హారర్ లాంటి ఎలిమెంట్స్ ఆమె పాత్ర ద్వారానే కాస్త కన్వే అయ్యాయి. హిమజ పాత్ర కేవలం ఫిల్లింగ్ కోసమే అనే అర్ధమయ్యేలా ఉంది. ప్రియా వడ్లమాని పాత్ర చిన్నదే అయినా కూడా సినిమాకి కీలకం. ఆమె నటన కూడా బాగానే ఉంది. సినిమాలో అందరికంటే ఆకట్టుకుంది మాత్రం భరణి పాత్ర. ఆత్మ కేస్‌ని ఇన్వెస్టిగేట్ చెయ్యడానికి వచ్చిన భరణి పాత్రకి మంచి అప్లాజ్ వచ్చింది.

‘ఆవిరి’ సినిమాని టెక్నికల్‌గా హైగా నిలపడానికి టెక్నీషియన్స్ బాగా శ్రమించారు. పరిమిత వనరులతో నిర్మించిన ఈ సినిమాలో రిపీట్ అనిపించే విజువల్స్ రాకుండా చాలా జాగ్రత్తలు తీసుకున్నారు సినిమాటోగ్రాఫర్ సుధాకర్ రెడ్డి. మామూలు సీన్స్ కూడా కాస్తో కూస్తో ఆకట్టుకున్నాయి అంటే డానికి కారణం సుధాకర్ రెడ్డి అని చెప్పొచ్చు. అలాగే ఆ విజువల్స్‌కి రాజేష్ వైద్య అందించిన ఆర్.ఆర్. కూడా బావుంది. మార్తాండ్ కె వెంకటేష్ సినిమాలో బోరింగ్ పార్ట్శ్‌ని చాలా వరకు కట్ చేసారు. అందుకే ఈ సినిమా రెండుగంటల లోపు నిడివితో బయటికి వచ్చింది.

ఓవర్ ఆల్‌గా చూస్తే హారర్ అండ్ థ్రిల్లర్ అనే అంశాలతో తెరకెక్కిన ఈ సినిమా ఆయా జోనర్స్‌ని ఇష్టపడేవాళ్ళకి మాత్రం ఓకే అనిపిస్తుంది. కానీ రిలీజ్‌కి ముందు హైప్‌ని అందుకోలేకపోయింది. దిల్ రాజు బ్రాండ్ కూడా వేస్ట్ అయిపోయింది.